واحدة من الحالات ...

المشكلة إنو المرور بعلاقة عاطفية لمن الواحد يكون ما جاهز ممكن يكون قرار سيء ...

أنا حبيت بكل العاطفة الجواي ... و انهيت العلاقة لمن انتبهت للتأثير السلبي على نفسي ... ما زلت بحاول اتخلص من البقية الباقية منه ...

أنا حبيتك شديد .. أكتر من أي انسان مر على حياتي .. و أعتقد إن ده حب كتير باعتبار اني بحب الناس الحولي شديد ... وهم بحسو بإني مختلفة في الحتة دي ...

شخصيتك مختلفة تمام الاختلاف عني .. ودي ما كانت مشكلة على الاطلاق بالنسبة لي ...

المشكلة كانت عدم الاحساس بإني في علاقة مع انسان بحبني وبفهمني بنفس القدر ...

الاحساس ده مهم على المدى الطويل ... ولمن انتبهت لعدم وجود مشاعر زي دي بشكل واضح ... قررت انسحب ...

الحب كان إحساس جميل ... مخدر للغاية ... مقدرتي الذهنية شكلها وصلت الأرض وبادية ترجع تاني ...

مرات كتيرة كنت بتقول حاجات مقلقة أو حتى مؤلمة ... وأنا ما كنت بقيف عندها لاني بقدم حسن النية ... وانو مستحيل انك تقول حاجة بغرض اني أتألم ...

أحياناً كنت بتساءل لأنا بفكر فيك وإنت لا ... أو أنا بتذكر تفاصيلك وإنت لا ... 

ليه أنا سمحت لك بالدخول في حياتي ... أنا ما قادرة أتذكر السبب الاهلك للدخول ... 

أحياناً بتمنى لو لقيتك بعد ما انتهيت من الدكتوراه  واشتغلت وسافرت وانجزت حاجات كتيرة ...

لكن برجع وبقول كدا أحسن ...

أحسن اني لقيت إجابة واضحة عن سؤال ما هو الحب ...

الحب شعور جميل وفوضوي ...

أيام بمنح شعور بالرضى والراحة ...

أيام بملأ حياتنا الأم و عذاب ...

أسوأ ما فيه إنو نهايته ما جميلة ... على الإطلاق ...

والأسوأ إنه لا يوجد من تلومه على الوقوع في الخندق ... ولا يوجد من يساعد على الخروج منه ... 

حاجه مملة ...

أنا حاسة بضرر من عدم نهاية علاقتنا بشكل واضح ... لكن ما قدرة اتنبأ بالضرر على المدى الطويل ... امكن ما حصلت حاجة ... وده خيالي سمح لي اني أملأ جزء كبير من تفكيري بك .. بوجودك وأفكارك و- الونسة معك ...

أنا حاسة اني حأكون أحسن المرة الجاية ... امكن أحب زول ما يحبني ...  وامكن أحب زول غلط ... وامكن ما أحب إطلاقاً ...

لكن المعروف بالنسبة لي .. اني حأكون أحسن ... في تقيمي للشخص القديم ... وتقيمي لإحتياجاتي كإنسان ... 

بس الحزن لسه حصل ... والألم موجود رغم إنو أقل كتير من الأول ... 

حيجي يوم حأكون فيه أقوى من الآن ...

وحأكون أحسن بمليون مرة من ما كنت عليه ... وما حدخل في علاقة من انسان مهما كنت بحب ما لم أكون واثقة من انو عايزني قدر ما أنا عايزة ...